நான் அருகதை அற்றவன்

நான் கனவுகள் விற்பவன்

கவிதையின் காதலன்

காதலின் கவிஞன்

சிலர் என்னை

கலைக்கிறுக்கன் என்கின்றனர் !

மோனைகளை முடுக்கி விட்டு

எதுகைகளை எடுத்தெறிந்து

வார்த்தைகளோடு விளையாடுவது

என் வியாபார வாடிக்கை !

நாயகனுக்கும் நாயகிக்கும்

ஊடல் என்றால்

நான்

கவலையோடு கூடல் கொள்கிறேன் !

அவர்கள் தழுவலுக்கு

நான் நெகிழ்கிறேன்

அவர்களின் கண்ணீருக்கு

நான் அழுகிறேன் !

சில நேரங்களில் நான் ,

மெட்டுக்குள்

முடங்கி விடுவதால் - என்னை

மொழியின் கொலைஞன்

என்போரும் உண்டு !

எனக்கும் ஒரு கூட்டம்

இருப்பதை நம்பவே முடியவில்லை

என்னை ரசிக்கும்

அவர்களின் ரசனைக்கு

நானும் ரசிகன் !

நான் கலைச் சேவகன் அல்ல .

மது குடித்த

மாலைப் பொழுதுகளில்

மல்லாந்து படுத்து

மதியைப் பார்த்தால் தான்

வரிகள் விளைந்து

கவிகள் கனிகின்றன !

சில நேரங்களில்

நான் திருட்டுக் கயவன் .

காவியங்களின்

காதல் ரசங்களைக்

களவாடிக் கவி செய்வதால்

" கற்பனையின் உச்சன் " என்று

போற்றப்படுபவன் !

என்னை

தமிழன்னையின்

தவப் புதல்வன் என்கின்றனர் .

அவளின் பாதங்களைத்

தொடக்கூட நான்

அருகதை அற்றவன் எனும்

அவலத்தை வெளியே தெரியாமல்

மறைத்துக்கொள்வதில் உள்ளது

என் வெற்றியின் ரகசியம் !!!