Thursday, January 13, 2011

எங்கே எனது பழைய விதி






எனக்கு என்னவாயிற்று ?

எல்லாம் மாறிவிட்டதோ ?


காலையில் யாரும்

என்னை எழுப்ப வில்லை .


கசங்கியிருந்த போர்வை

ஒரு குறையாய்த் தோன்றவில்லை !


கேட்காமலேயே அம்மா

காபி கொடுத்தாள் !


சேர்ந்து சாப்பிட

தங்கை அழைத்தாள்


அப்பாவின் பார்வையில்

அதிசயமாய்

அன்பு இருந்தது !


வெளியே வந்தேன் .

என்னை வரவேற்க

வானவில்லின்

வளையம் இருந்தது !


சிறிது நடந்தேன்

பூக்களின்

பாதை தெரிந்தது !


ஒரு சிறுமி வந்தாள்

இனிப்பு கொடுத்தாள்

அவளுக்குப் பிறந்தநாளாம் !

எனக்கும் தானோ ?


சாலையில் நடந்தேன்

குறும்பாய்ப் பார்த்தபடி

கன்னி ஒருத்தி

கடந்து சென்றாள் .


எவர் குழந்தையோ

என்னைப் பார்த்து

வெள்ளையாய்ச் சிரித்தது !


கேட்காமலேயே

காசு கொடுத்தேன்

பிச்சைக்காரன் புன்னகைத்தான் .


வேலைக்காக

விண்ணப்பித்தேன்

அஞ்சல்காரன் ஆசீர்வதித்தான் !


பாழாய்ப்போன

என் பழைய விதியைத்

தேடினேன் .

கடைசி வரை

கிடைக்க வில்லை !


என்ன மாயம் நடந்தது ?


அட ,


நேற்றுத்தான்

அவளிடம்

என் காதலைச் சொல்லி இருந்தேன் .

அவளும்

அழகாய்ச் சிவந்து

சம்மதம் என்றிருந்தாள்.


பாருங்களேன் ,

எனது

இந்தப் புலம்பலும்

ஒரு கவிதையாய் மாறிவிட்ட

அதிசயத்தை !!!









No comments:

Post a Comment