Thursday, December 26, 2013


மனிதன் என்பவன் .............







ஒரு
மங்களகரமான
வெள்ளிக்கிழமை !

குளித்துவிட்டு
மடியாகக்
கோவிலுக்குக்
கிளம்பினேன் !

பக்கத்துவீட்டுக் குழந்தை
வீறிட்டழுதது !

இருசக்கர வாகனமொன்று
சேறிறைத்தது !

எதிரில் வந்தவன்
காறி உமிழ்ந்தான் !

கழிவுநீர் ஊர்தி
கடந்து போனது !

எவனோ
எவனையோ திட்டிய
கெட்டவார்த்தை
காற்றுவாக்கில்
காதில் வந்தது !

இனவிருத்தியில்
இரு நாய்கள் !

தள்ளுவண்டியில்
மாட்டிறைச்சி !
பக்கத்தில்
பன்றியிறைச்சி !

குடித்துவிட்டு
ஒருவன்
வாந்தியெடுத்தான் !

கோவிலில்
வாங்கிய பூ
வாடியிருந்தது !

ஒரு
கிழிந்த நோட்டு
கைக்கு வந்தது !
சில்லறை இல்லையாம் !

நுழையும்போதே
வலதுகால்
தடுக்கியது !

போடாத காசிற்குப்
பிச்சைக்காரி
சபித்து அனுப்பினாள் !

உள்ளே
கொடுங்கூட்டம் !

வாங்கிய விளக்கில்
திரியைக் காணவில்லை !

வரிசையில்
ஒருவன்
காலை மிதித்தான் !

கொடுத்த தேங்காய்
அழுகிவிட்டது !

தரிசனம் காணும்போது
தலைகள் மறைத்தன !

ஒற்றும்போது
கற்பூரம்
அணைந்தது !

அந்தக்கிழிந்த நோட்டை
அய்யர்
கூப்பிட்டுத்
திருப்பிக் கொடுத்தார் !

பாதி வரிசையில்
பிரசாதம் தீர்ந்தது !

வெளியே வந்தால்
செருப்பைக் காணவில்லை !

அணையாதிருந்த
துண்டுபீடி
காலைச்சுட்டது !

அறைக்கு வந்தால்
மின்சாரமில்லை !

இவையெல்லாம் நடந்து
ஆறுநாட்கள் கழித்து ....................

ஒரு
மங்களகரமான
வெள்ளிக்கிழமை !

குளித்துவிட்டு
மடியாகக்
கோவிலுக்குக்
கிளம்பினேன் !

காரணம்,
மனிதன் என்பவன்
பழக்கத்திற்கு
அடிமைப்பட்டவன் !








Wednesday, December 18, 2013


திருமணம் 2013 




 

' சொல்லியனுப்புகிறோம் '
என்ற சொல்லை
காலம் என்ற
விலை கொடுத்து
பெண் வீட்டார்
வாங்கி விட்டனர் !
--------------------------------------------

இன்ஜினியர் பெண்ணும்
இன்ஜினியர் ஆணும்
தம்பதியாவது
காலத்தின் கட்டாயம் !
டாக்டருக்கும் இது
டிட்டோ !
--------------------------------------------

திருமணம்
கல்லூரியில்
நிச்சயிக்கப்படுகிறது !
--------------------------------------------

மாப்பிள்ளையின்
சம்பளமும்
மறைமுக
வரதட்சணைதான் !
கொண்டுவாருங்கள்
இதற்கொரு
இ. பி. கோ !
--------------------------------------------

குவித்துத்தான்
வைக்கிறார்கள்
ஆண் ஜாதகத்தை !
பொறுக்கித்தான்
எடுக்கிறார்கள்
பெண் ஜாதகத்தை !
--------------------------------------------

ஒவொரு வினைக்கும்
எதிர்வினை உண்டு !
ஆணினமே
அனுபவி !
--------------------------------------------

காலஸ்த்ரி,
திருநாகேஸ்வரம்,
திருவிடந்தை,
திருமணஞ்சேரி .......................
அடுத்து என்ன
ஜோசியரே ?
--------------------------------------------

தந்தை மகற்காற்றும் உதவி திருமணத்திற்கு
சாதி பார்க்காச் செயல் !
--------------------------------------------

அஷ்டமச்சனியாம் !
முப்பது
முடிய வேண்டுமாம் !
ஜென்ம குருவாம்
ஒருவருடம்
போக வேண்டுமாம் !
அடுத்து வரும்
ராகு தசையோ
பதினெட்டு வருடமாம் !
அட ஆண்டவா !!!!!!!!!!
--------------------------------------------

படித்துக்
கொண்டிருக்கும் பெண்
வரனாய் வந்தால் ........
பெற்றோர்களே உஷார் !
--------------------------------------------

பஜ்ஜி சொஜ்ஜி
தின்று விட்டு
பாட்டு கேட்டு
வந்தது
அந்தக்காலம் !
நேர்முகத்தேர்வொன்றை
நடுவீட்டில் சந்தித்து
நாக்குத்தள்ளி
வந்தது
இந்தக்காலம் !
--------------------------------------------

திருமண அகராதியில்
நம்பிக்கை துரோகம்
என்பதன் பொருள்
புத்திசாலித்தனமான
தேர்ந்தெடுப்பு !
--------------------------------------------

இந்தியாவின்
மாப்பிள்ளைக் களஞ்சியங்கள்
எனப்படுவவை -----------------------

விடை : சாப்ட்வேர் நிறுவனங்கள் !
--------------------------------------------

கனவு காணாதே !
பெண் பார்த்து
நிச்சயிக்கப்பட்டு
தாலி கட்டி
திருமணம் முடிந்து
முதலிரவும்
முடிந்தால் தான்
அவள் உன்
மனைவி !
--------------------------------------------

பல்லைப் பிடித்துப்
பார்த்துத்தான்
மாப்பிள்ளை
வாங்கப்படுகிறது !
--------------------------------------------

முகநூலின்
காதலெல்லாம்
திருமணத்தில்
சேர்த்தியில்லை !
--------------------------------------------

திருமணத்திற்கு
முன்பான
ஒரு பழைய காதலில்
எல்லாம் இருந்ததாம்
எல்லை மட்டும்
தாண்டவில்லையாம் !
இதுதானய்யா
இந்தஊர்
கற்பு !
--------------------------------------------

பெண்பாவம்
பொசுக்கிவிடும் !
ஆண்பாவம்
இன்னொரு ஆணுக்கு
வாழ்க்கை தரும் !
--------------------------------------------

அப்போதும்
இப்போதும்
சுயம்வரம்
ஆணுக்கு நடந்ததாய்
சரித்திரமுண்டோ ?
--------------------------------------------

ஆண்
வயதுக்கு
வந்தாலும்
இனி
சடங்கு நடத்தலாம் !
--------------------------------------------

முப்பது கடந்து
முடி கொட்டி
தொப்பை வந்து
சுமார் மூஞ்சி
சுமார் சம்பள
ஆணாய் நீயிருந்தால் ..........
ஸாரி நண்பா !
better luck to next ஜென்மம் !!!








Thursday, December 12, 2013

ஒரு விடைபெறுதல் 



தேநீர்
ஆறிக்கொண்டிருக்கிறது !

மேஜையில்
எதிரெதிராக
நீ !
நான் !

தேநீருடன் கூடிய
நம் கடைசிச்சந்திப்பு !

தலைகுனிந்தபடி
நீ !
உன்னையே பார்த்தபடி
நான் !

ஒருவகையில்
நம்
முதல் சந்திப்பிலும்
இப்படித்தானிருந்தோம் !

வேடிக்கைதான் !

இருவீட்டார்
சம்மதத்துடன்
நாம்
பிரியப்போகிறோம் !

சுற்றிலும்
ஆங்காங்கே
தேநீர் அருந்தும்
காதலர்களின்
ஆசிர்வாதத்தோடு
நாம்
பிரியப்போகிறோம் !

என்
இரண்டுவார தாடி
உனக்குப்பிடிக்காதுதான் !

நினைவிருக்கிறதா
இந்த

 நீல நிறச்சட்டை
நீ
வாங்கித்தந்தது !

என்
கை நகங்களில்
அழுக்குப் படிந்துள்ளது !

சற்று முன்னர்தான்
சிகெரெட் பிடித்தேன் !

என்னில்
எல்லாமே
இயற்கையாக
இருக்கின்றன
என்
புன்னகையைத்தவிர !

எனக்குப்பிடித்த
மஞ்சள் சுடிதாரில்
நீ வரவில்லை !

பவுடர்
சற்று அதிகம் !

கூந்தலில்
ரோஜா இல்லை !

நான்
வாங்கித்தந்த
பிளாஸ்டிக் வளையல்களை
உன்கைகள்
அணிந்திருக்கவில்லை !

உதட்டுச்சாயத்தைக்
கொஞ்சம்
குறைத்திருக்கலாம் !

உன்னில்
எல்லாமே
செயற்கையாக
இருக்கின்றன !
உன்
கண்களைத்தவிர !

அந்தக்கண்களில்
கண்ணீர் வரவேண்டாம் !
வரக்கூடாது !

பின்னே,
உன்னைப் புறக்கணிப்பதாய்
நான் அரங்கேற்றிய
நாடகங்கள்
வீணாய்ப்போவதா ?

உன்
தந்தைக்கு
மகிழ்ச்சிதானே !

உன்தாய்
இப்போது
அழுவதில்லையே !

உனக்கும்
ஒருவகையில்
நிம்மதி !

அந்த
அமெரிக்க மாப்பிள்ளையைக்
கேட்டதாகச் சொல் !

நல்ல வேலையை
நான் இன்னும்
தேடிக்கொண்டிருக்கிறேன் !

தங்கையின்
திருமணத்திற்கு
லோன் போடவேண்டும் !

இதோ !

நாம்
எடுத்துக்கொண்ட
புகைப்படங்கள் !

இவற்றை
உன் வீட்டில்
என்ன செய்வார்கள் ?

எரிப்பார்களா ?
புதைப்பார்களா ?

கடைசியாக,
கண்கள் உதிர்த்த
கண்ணீர்த்துளிகளை
நீ
கவனிக்கவில்லையென்ற
நம்பிக்கையுடன்
நான்
எழுந்து கொள்கிறேன் ?