Monday, January 31, 2011

உமிழ்தல்


வேலை முடிந்து

வீடு திரும்பிக்கொண்டிருந்தேன் !

அம்மா அசைவம் சமைத்திருப்பாள்

அமுதமென உண்ணலாம் !

அசைபோட்டபடி நடந்தேன் !

எதிரே வந்தவன் காறி உமிழ்ந்தான் !

செருப்பு அடியையும்

செவிட்டு அறையும்

சேர்ந்தாற்போல உணர்ந்தேன் !


துப்புதல் என்ன

தேசிய வியாதியா ?

சுவாசம் போன்று

இன்னொரு அநிச்சையா ?

இல்லை

தொண்டையின் சாபமா?

அல்லது

எச்சிலின் கோபமா ?

அன்று

பற்களோடு வாயசெய்த

பகிங்கரக் காமமா ?


ஒருவேளை அது

பொறாமையின் புறத் தோற்றமோ ?

அருவருப்பின் உருவமைப்போ ?

துப்பியவனுக்கே வெளிச்சம் !


என்னைப்பொறுத்தவரை இது

நெஞ்சின் நஞ்சு !

ஆத்திரத்தின் மூத்திரம் !


எல்லாருடைய

அடிநாக்கிலும் இருக்கிறது - இந்த

அவமதிப்பு ஆயுதம் !


மனித இதயத்தின்

மொத்த ஈரமும்

உமிழ்ந்து உமிழ்ந்தே

உலர்ந்து விட்டதோ ?


துப்புதல் என்பது

இருமலின் பின்குறிப்பாக

இருந்த போதிலும்

பெரும்பாலும்

தனிக்குறிப்பாகத்தான்

துள்ளிவருகிறது !


கடுப்பாக இருந்தது

வெறியோடு நடந்தேன் !


எதிரே ஒருவன்

எவளுடனோ அலைபேசியில்

அளந்து கொண்டு வந்தான் !

பார்த்தால் முந்தாநாள்

துப்பியவன் போலிருந்தான் !

வேகமாய்

வயிற்றெரிச்சலுக்கு வடிவம்கொடுத்து

தரையில் எறிந்தேன் !

த்த்த்தூ..........

ஒருவேளை

இந்தத்தொற்றுநோய்

இப்படித்தான்

ஒவ்வொருவனிடமிருந்தும்

ஆரம்பமாகிறதோ ?





Saturday, January 29, 2011

படைப்புலகப் பிச்சைக்காரன்


இப்போதெல்லாம்

பாடு பொருள்கள் கிடைப்பதில்லை !


கற்பனைகள்

வறண்டு விட்டன !


உவமைகள்

தீர்ந்து விட்டன !


மோனைகள்

முரண்டு பிடிக்க ,

எதுகைகள்

ஏளனம் செய்கின்றன !


வார்த்தைகளை

மாற்றிப் போட்டே

வண்டி ஓடுகிறது !


பக்கத்து மொழியிடம்

கடன் வாங்கித்தான்

பிழைப்பே நடக்கிறது !


மூளையைப் போலவே

மழுங்கிக் கிடக்கிறது

என் பேனாவின் முனையும் !


எனக்கும்

கசாப்புக்கடைக்காரனுக்கும்

வித்தியாசம் ஒன்றுமில்லை !

அவன் கூறுபோடுவது ஆட்டை !

நான் கூறு போடுவது பாட்டை !

அவன் கொல்வது கோழியை !

நான் கொல்வது மொழியை !


இதில் அவ்வப்போது

இலக்கியச் சேவை வேறு !


அறுபதுபக்கத்தொகுப்பில்

பொருளடக்கமே மூன்று பக்கம் !

அணிந்துரைகளும்

பொழிப்புரைகளும்

சேர்ந்தாற்போல இருபது பக்கம் !

இதில்

என்னுரை ஒரு

ஏழு பக்கம் !

கணக்கிடுங்கள்

கவிதைகள் எத்தனை பக்கம் ?

இதில் கொடுமை என்னவென்றால்

தலா ஒரு கவிதைக்கு

நான்கு பக்கம் என

நாசூக்காய் ஒத்துக்கியிருந்தேன் !


என்னை யாராவது கவிஞன்

என்றால் சிரிப்பு வருகிறது !


நான் சட்டைப்பையில்

குறிப்புத்தாளுடன் அலைகிறேன் !

எங்கேயாவது ,

எவனாவது ,

எதையாவது சொன்னால்

சடுதியில் குறித்துக்கொள்ள !


"படைப்புலகப் பிச்சைக்காரன் " என்பது

எனக்கு நானே வழங்கிய பட்டம் !


கொஞ்சம் இருங்கள் ..............


எனது அடுத்த கவிதை

இப்போது தயாராகி விட்டது .

வருகிறேன் !!!






தமிழ் எந்தன் தாயடி ..........


அன்பே ,

ஆருயிரே ,

இனிமையின் ஈர்ப்பே ,

ஈர்க்கின்ற இனிமையே ,

உன்னத உயிரே ,

ஊறுகின்ற உணர்வே ,

என்னில் பாதியே ,

ஏற்றமிகு எழிலே ,

ஐம்பொன் அழகே ,

ஒப்பிலா வனப்பே ,

ஓங்காரச் சிறப்பே ,

ஒளவையின் மொழியே ,

அக்கின் நிறைவே !


புகழுரை போதுமா ?

இன்னமும் வேண்டுமா ?

புன்னகைத்தது போதும்

மீதியையும் படி !


தமிழ் எந்தன் தாயடி !

நான் தமிழுக்கு மகனடி !


முதலில் அவளுக்கு நன்றி சொல் !

முடிந்தால் விழுந்து வணங்கு !


ஏனெனில் ,

இந்தப்பாட்டில்

உன்னைப்பாட ,

அவள் தன்னுயிரைத்

தந்துள்ளாள் !!!

கோபத்தை நிறுத்தி விடாதே


சில பொழுதுகளில்

காக்க வைத்து

தவிக்க விட்டால்

கோபித்துக் கொள்ளுகிறாய் !


தனிமைச் சூழலில்

துணிந்து தொட்டால்

சினந்து தள்ளுகிறாய் !


சின்னச் சின்ன

பொய்கள் சொன்னால்

சிவந்து துள்ளுகிறாய் !


கடந்து செல்லும்

கன்னியை கவனித்தால்

காரமாய்க் கிள்ளுகிறாய் !


உன்னிடம்

எனக்குப் பிடித்ததே

என்னிடம்

நீ கொள்ளும் கோபம் தான் !


உனது கோபத்தை

என் மீது நீ கொண்ட

உரிமையின் வெளிப்பாடாய்

உணர்கிறேன் !

அக்கறையின் அம்சமாய்

அறிகிறேன் !

கரிசனத்தின் தரிசனமாய்க்

காண்கிறேன் !


தயவு செய்து

உனது கோபத்தை நிறுத்தி விடாதே !!!







குறிப்பு : இந்தக் கவிதையில் " கொள்கிறாய் " என்கிற பதம் " கொள்ளுகிறாய் " என்று ஓசை நயத்துக்காக எடுத்தாளப்பட்டுள்ளது .





முன் குறிப்பு : இந்தக் கவிதை வயது வந்தவர்களுக்கு மட்டும்




நீயும் நானும்




பழுத்த மரம் நீ


பசித்த மரங்கொத்தி நான்


கொத்துகிறேன் !




மல்லாந்த உரல் நீ


செங்குத்து உலக்கை நான்


இடிக்கிறேன் !




பவளத் தோணி நீ


பக்குவத் துடுப்பு நான்


துழாவுகிறேன் !




குழைந்த நிலம் நீ


குத்திக்கிழிக்கும் ஏர் நான்


உழுகிறேன் !




திறந்த பூட்டு நீ


தினவெடுத்த சாவி நான்


நுழைகிறேன் !




தேன்ததும்பும் பூ நீ


தேள்கொடுக்குத் தேனீ நான்


கொட்டுகிறேன் !




பிளந்த பாதை நீ


புறப்பட்ட அம்பு நான்


பயணிக்கிறேன் !!!






பின் குறிப்பு : இந்தக் கவிதைக்கான களம் களவாடப்பட்டது


உறங்கினது போதும் தம்பி


உறங்கினது போதும் தம்பி

வரபோகும் விடியல்

உன்னை நம்பி !


வந்து விட்டது

உன் காலம் ,

நீ தான் எங்களின்

எதிர்காலம் !


சோர்ந்து கிடக்கிறான்

இறைவன் ,

உடனடித் தேவை

ஒரு தலைவன் !


இதுவரை பொறுத்தது

உன் பணிவு ,

உனது தலைமையில்

பிறந்திடும் புதுத்துணிவு !


எட்டு வையடா

மேற்கொண்டு ,

தடைகள் எல்லாம்

கற்கண்டு !


தகுதி என்னடா தகுதி

நீ எங்கள்

இதயத்தின்

இன்னொரு பகுதி !


உன்னையன்றி

யாருமில்லை கதி ,

எங்களை வாழச்செயவதே

உந்தன் விதி !

Friday, January 28, 2011

குறிப்பு : இந்தக் கவிதை என் அலுவலக நண்பர்களுக்கு மட்டும் .............



காதல் மன்னர்கள்



ஆண்களால் ஆன

எனது தொழிற்ச்சாலை

காதலால் இயங்குகிறது !


அங்கே

ஒவ்வொரு ஊழியனும்

ஒரு காதலன் !

ஒவ்வொரு காதலனும்

ஒரு ஊழியன் !


என் அலுவலகத்தில்

இருக்கிறார்கள்

காதலின் கர்த்தாக்கள் !


இதயத்தை

சின்னமாகக் கொண்ட

காதல் மன்னர்கள்

சிலரைப் பற்றி இதோ.............


வினோபா ,

காதலில்

சோதனைகளை

அதிகம் பார்த்ததில்

அவன் ஒரு சாதனையாளன் !


கௌரி ஷங்கர் ,

காதல் சாம்பலில்

மீண்டும் உயிர்த்த

பீனிக்ஸ் பறவை !


அருள் முருகன் ,

காதலைப் போராடி வென்ற

கர்ம வீரன் !


ஜெகன் ,

விடலைப் பெண்களின்

உள்ளம் கவர்ந்த

வெள்ளை வித்தகன் !


மாணிக்கராஜ் ,

பேசிப் பேசியே

காதலைக் கனிவித்த

இன்சொல் அரசன் !


பீட்டர் ,

பைங்கிளிகளின்

பக்குவம் தெரிந்த

பண்பாளன் !


மனோஜ் ,

மலர்க்கொடிகளின்

மனம் கவர்ந்த

மன்மதன் !


ஹரி ,

கன்னிப் பெண்களின்

கனவு நாயகன் !


ராமதாஸ் ,

ஊடல் இருந்தாலும்

காதல் குறையாத

உத்தம புருஷன் !


பிரதீசும்

கருணாகரனும்

காதலியைக் கைப்பிடித்த

கண்ணியவான்கள் !


இந்தக் காதல் யுத்தத்தில்

களம் கிடைக்காத

நானும் தினேஷும் ,

துணைவிக்காக தவமிருக்கும்

விதியின்

விளையாட்டு பொம்மைகள் !!!








குறிப்பு : கண்டிப்பாக ஆண்களுக்கு மட்டும் .


நீ ஆம்பளையாப் பொறக்கணும்


கடைசியா என்னக்

கருப்புன்னு மறுத்தவளே ,

காசுக்காக வெறுத்தவளே ,

கேட்டுக்கடி கள்ளச்சிறுக்கி !


நாப்பதுக்கும் மேல

நாய் கூட சீண்டாது ,

நாறிப் போன உடம்பு

நாலு காசு பெறாது !


உன் நெனப்பில்லாம

வேகாதுடி இந்தக்கட்டை !

மனசுங்கறது உனக்கு

கழட்டி மாட்டுற சட்டை !


காதலிக்கும்போது

நீ தாண்டி என் கண்ணு !

உனக்கோ நான்

பத்தோட பதினொன்னு !


காதல்ங்கறது எனக்கு

ரெண்டாவது உசுரு !

உனக்கோ அது

ஒண்ணுமில்லாத மசுரு !


நான்தாண்டி

தாடி வளத்து

தரிசாப் போறேன் !

நீ

அமெரிக்காவுல

அலையன்ஸ் பாக்குற !


என் வேதனைய

உணராத உத்தமியே ,

அடுத்த சென்மத்துலயாவது

நீ ஆமபளயாப் பொறக்கணும் !!!

நீ ஆமபளயாப் பொறக்கணும் !!!




மீனவ வேதனை


இதுவரையிலான எமது

கண்ணீரால் கரிக்கின்ற கடல் - இனி

செந்நீரால் சிவப்பாகும் !


கோடி முறை

பொங்கினாலும்

எமது கவலைகள்

அலையைப்போல

கடலுக்குள்ளேயே

முடங்கி விடுகின்றன !


கடல் எங்களின் தாய் !

தாயன்பில் ,

தாயின் மீதான உரிமையில்

எல்லைகளை

ஏற்கத் தெரியவில்லை

எங்களுக்கு !


கண்முன்னே

பிள்ளைகள் சாவதை

எந்தத் தாயும் தாங்க மாட்டாள் .

ஆகவே ,

எங்களை

வதைத்துக்கொல்லும்

வழக்கத்தை வேறெங்காவது

வைத்துக்கொள்ளுங்கள் !

தயவு செய்து கடலில் வேண்டாம் !


கண்டனங்கள் ,

இரங்கல்கள் ,

அறிக்கைகள் ,

சந்திப்புகள் ,

தீர்மானங்கள் ,

நிவாரணங்கள் ,

இவைகளின் மீதான

நம்பிக்கையும்

எங்களைப்போலவே

எங்களிடம் செத்து விட்டது !


ஆயிரம் இன்னல்கள்

வந்தாலும்

அன்னை மடியை

விட்டு விடாத

குழந்தைகள் நாங்கள் !


எங்களுக்கு வேறு

போக்கிடம் இல்லை !