Note : This poem is based on the spectrum broad band issue ............................

விரைந்து வருவாயா தலைவா ?

தோரணங்களில் நீ சிரிக்க எனக்கு

காரணங்கள் தேவையில்லை !

நீ சிரிக்க வேண்டும் !

அது போதும் !

நீ

மேடைகளில்

முழங்கும்போது - உனக்கு

மாலை போட

முண்டியடிப்பவன் நான் !

என்னை உனக்குத் தெரியாது

எனக்கு உன்னை மட்டுமே தெரியும் !

உனக்கு வணக்கம் சொல்லாமல்

எனக்குப் பொழுதுகள் விடிவதில்லை !

உன்னை வாழ்த்திப்பாடாமல்

என் இரவுகள் இனிப்பதில்லை !

தலைவன் என்று

நீ வந்துவிட்டதால் ,

இறைவன் என்று

எவன் இருந்தாலும்

ஏற்றுக்கொள்ள மறுக்கிறேன் !

என் வீட்டில் ஒருவேளை

அடுப்பு எரிந்தாலும் ,

அரிசியில் உன் முகத்தையே

தரிசிக்கிறேன் !

குடிசையில் நான் இருந்தாலும் - நீ

கோபுரத்தில் வாழ வேண்டும் !

மண்தரையில் நான் படுத்தாலும் - நீ

மலர் மஞ்சத்தில் உறங்கவேண்டும் !

என்னைப் பொறுத்தவரை ,

மாநாடுகள் தான்

மகிழ்ச்சியான திருநாள்கள் !

பொதுக்கூட்டங்கள் தான்

பிடித்தமான பண்டிகைகள் !

சுவரொட்டியில் உனது

சிரிப்பைக் கண்டால்தான்

சிந்தனையே சீராகும் !

கரைவேட்டியைக்

கட்டினாலே போதும் ,

கவலைகள் மறந்து

கம்பீரம் பிறந்து விடும் !

கொடிகளைக் கண்ட மனமோ

களிப்படைந்து கொண்டாடும் !

எதோ பெரிய இழப்பாம் !

தொகை மட்டும்

லட்சங்களின் கோடியாம் !

புலன் ஆய்ந்தவர்கள்

பட்டியல் நீட்டி ,

வில்லங்கத்திற்கு

விஞ்ஞான விளக்கம் சொல்கிறார்கள் !

வீணாய்ப்போன மண்டைக்குத்தான்

விளங்க மாட்டேன் என்கிறது !

பத்திரிக்கைகள்

பக்கம் பக்கமாய் எழுதுகின்றன !

எதிர்க்கட்சிகள்

ஏளனமாய்ச் சிரிக்கின்றன !

அண்டை வீட்டுக்காரன் கூட

ஆவேசமாய் ஏசுகிறான் !

யாவற்றையும் ,

நிலவின் களங்கம் - என்று கூறி ,

நாசூக்காய்

நகர்ந்து விடுகிறேன் !

மனசாட்சி மட்டும்

முரண்டு பிடிக்கிறது

மது இருந்தால் அதுவும்

மாண்டு போகும் !

இது வேறு ஒன்றுமில்லை தலைவா !

சூழ்நிலை பின்னிய

சூழ்ச்சிவலை !

விதி செய்த சதி !

காலம் போட்ட கோலம் !

சரித்திரத்தின் சோதனை இது

சோர்ந்து விடாதே !

வரலாற்றின் வேதனை இது

வீழ்ந்து விடாதே !

ஆனால் ,

மௌனத்தை எப்போது

உடைக்கப் போகிறாய் ?

கறைகளை எப்போது

துடைக்கப் போகிறாய் ?

இகழ்ச்சிகளை

இல்லாமல் செய்வாயா ?

தூற்றுதல்களைத்

தூக்கி எறிய வருவாயா ?

எப்போது என

நான் நம்பிக்கையோடு காத்திருக்கிறேன் !

நாளைய தீர்ப்பில் ,

நியாயத்தின் பக்கம்

நீ இல்லை என்றானாலும் ,

நாணிச் சாக நானிருக்கிறேன் !

நீ நிமிர்ந்தே நட !

இறுதியாக ,

ஒரே ஒரு வேண்டுகோள் !

எனக்காகவோ

உனக்காகவோ வேண்டாம் - நம்

உறவுக்காகவாவது ,

உண்மையை உலகிற்கு உரைத்திட

விரைந்து வருவாயா தலைவா ???