Thursday, February 17, 2011

தவற விட்ட தருணங்கள்



பேருந்து ஜன்னலில் ,

எட்டிப்பார்த்த குழந்தையொன்று

அழகாய்ச் சிரித்தது !

பதிலுக்கு சிரித்திருக்கலாம்

பேருந்து காத்திருக்கவில்லை !


தனியாய் வந்த திருமதி

தவிப்போடு பார்த்தாள்

பதிலுக்குப் பார்த்திருக்கலாம்

"தயக்கம்" தடைசெய்து தொலைத்தது !


தந்தை எதற்கோ திட்டினார்

தலைகுனிந்து கேட்டிருக்கலாம் !

அகந்தை அனுமதிக்கவில்லை !


நொண்டிப்பிச்சைக்காரன்

கைநீட்டிக் காசு கேட்டான் !

மூன்று ரூபாயாவது கொடுத்திருக்கலாம்

முகங்கோணிப் புலம்பிச் சென்றான் !


அறைநண்பன் ஒருவன்

மூன்று வயது மூத்தவன் !

"அண்ணா " என்றே அழைத்திருக்கலாம்

"தன்மானம் " தடுத்து விட்டது !


பிடித்த பாடல் ஒன்று ,

பண்பலையில் பவனி வந்தது !

கேட்டுவிட்டே போயிருக்கலாம்

காலம் மறுத்து விட்டது !


அன்பு மனைவி ,

ஆசையாய் வார்த்த தோசை

அருமையாக இருந்தது !

இன்னும் இரண்டு சாப்பிட்டிருக்கலாம் !

இரண்டு நிமிடங்களை ,

இழக்கவேண்டி இருந்திருக்கும் !


தாய்க்கு உடல் சுகமில்லையாம்

தாமதப்பணியாளன் காரணம் சொன்னான் !

திட்டாமல் விட்டிருக்கலாம் !

தலைகுனிந்த படியே சென்றுவிட்டான் !


பக்கத்து வீட்டுப் பரந்தாமன் மகன் ,

பந்தடித்து விளையாடியதில்

பாதி ஜன்னல் பெயர்ந்துவிட்டது !

சமாதானமாகப் போயிருக்கலாம்

சண்டையைத் தெருவே வேடிக்கை பார்த்தது !


இதுபோன்ற

தவற விட்ட தருணங்களுக்காக

தயவுசெய்து என்னை

இன்னொரு முறை

படைத்து விடு இறைவா !!!



No comments:

Post a Comment