Wednesday, February 16, 2011

குறிப்பு : இந்தக் கவிதை கட்டை பிரம்மச்சாரிகளுக்கு ............. காதலிப்பவர்கள் படிக்கவேண்டாம்


விதியே முடிந்து விட்டது



எதிரே வருகிற எவளும்

ஏறெடுத்தும் பார்ப்பதில்லை !


திருமதிகளைக் கண்டால்

தலை தானாய்க் குனிந்து கொள்கிறது !


வலைகளில்

வலைவீசத் தெரியவில்லை !


மின்னஞ்சல்களில்

முயன்று பார்க்கத் தோன்றவில்லை !


குறுஞ்செய்திகளில்

குசலம் விசாரிக்க யாருமில்லை !


வருடக்கணக்காய்

வீட்டில் வரன் பார்க்கிறார்கள் !


நடுமீசையில் எட்டிப்பார்க்கிறது

நரைத்த முடி ஒன்று !


பித்தம் என்று

பித்தலாட்டம் செய்தாலும்

கயமையைக் கண்கள்

காட்டிக்கொடுக்கின்றன !


பாதி வருடம் போனால்

பாதிக் கிழடு என்பார்கள் !


கல்லூரிகளில்

காதல் கோட்டை

கட்டாமல் விட்டது

கடைசியில் ஓட்டையாகி விட்டது !


பணியிலாவது

பார்த்துக்கொள்ளலாம் என்றால் ,

ஆண்கள் மட்டுமே

அணியில் உள்ளனர் !


தொலைகாட்சி மட்டுமே

தற்போதைய தோழி !


பல்போன கிழவிதான்

பக்கத்து வீட்டின் பேச்சுத் துணை !


நோயில் படுத்தால்

நாதியில்லை கேட்பதற்கு !


சுயசமையலைச் சாப்பிட்டே

சுரணை செத்துவிட்டது !


அழுக்குத் துணிகளை அலசியே

ஆயுள் ரேகை தேய்ந்து விட்டது !


தவிப்பைத் தாங்காமல்

தலையணை தவிக்கிறது !


பெருமூச்சில்

போர்வையே பொசுங்குகிறது !


பாயில் பக்கத்தில் படுக்க

பேய் கூட பயக்கிறது !


பேருந்தில்

பெண்களே இருப்பதில்லை !


திரையரங்குகளில்

தேடினாலும் கிடைப்பதில்லை !


கோவில்களில் குடியே இருந்தாலும்

கடைக்கண் பார்வையைக்

கன்னிகள் காட்டுவதே இல்லை !


வீதி வீதியாய் அலைந்தாலும்

விரக்திதான் விஞ்சுகிறது !


அழகு இல்லாததால் அலைவரிசை

அந்தரத்தில் அலைகிறது !


கற்பனையைக் காதலித்தாலும் ,

கற்பனையில் காதலித்தாலும்

பருகக் கிடைப்பது கானல்நீர்தான் !


இளமையின் எழுச்சி

இற்றுப்போய் விட்டது !


மன்மதப் பாடம்

மறந்து போய் விட்டது !


தனியாகவே காலந்தள்ள

தைரியம் பிறந்தாலும் ,


விடியும் விடியும் என்று காத்திருந்து ,

விதியில் பாதி முடிந்து விட்டது !!!












No comments:

Post a Comment