நண்பன்
நானும் அவனும்
ஒரே சமயத்தில் ,
ஒரே தொழிற்சாலையில் தான்
பணியில் சேர்ந்தோம் !
இருவரும் ,
வேறு வேறு துறைகள் !
அவன் தர நிர்ணயம் !
நான் தரக்கட்டுப்பாடு !
ஆறு மாதங்கள் கழித்தே என்
அறையில் வந்து தங்கினான் !
ஒரே அறையில் தங்கியதால்
நண்பர்களாக ஆனோம் !
பிறகு ,
நண்பர்களாக ஆகிவிட்டதால்
ஒரே அறையில் தங்கினோம் !
ஒவ்வொரு முறையும் ,
" மச்சி , மச்சி " என்று அவனைக்
கூப்பிடும் போதெல்லாம் ,
அவனுடைய காதலியை
எனது தங்கையாகத் தான் உணர்கிறேன் !
அவனுடைய தாயை
நான் " அம்மா " என்றே அழைக்கிறேன் !
நட்பில் தான்
அன்பின் வசதிக்காக மட்டுமே ,
உறவுகள் உருவாக்கப்படுகின்றன !
அறையில் அவ்வப்போது
விளையாட்டாய் ,
மல்யுத்தத்தில் ஈடுபடுவோம் !
பெரும்பாலும் தோற்பது அவன்தான் !
பாவி ,
விட்டுக்கொடுக்காமல் இருத்தலை
விளையாட்டாய்க்கூடச் செய்யமாட்டான் !
அறையில் பெரும்பாலும்
சமைப்பவன் அவன்தான் !
அதிலும் ,
அவன் சமைக்கும் உப்புமாவிற்கு
அப்படியே அம்மாவின் கைப்பக்குவம் !
மது அருந்த மாட்டான் !
ஆனால் நான் மது அருந்தும்போதெல்லாம்
கூடவே அமர்ந்து பேசிக்கொண்டிருப்பான் !
அறையில் நான் இல்லாத
சமயங்களில் கூட ,
தொலைக்காட்சியில் ,
எனக்குப் பிடித்த பாடலை ,
எனக்காகப் பார்த்துக்கொண்டிருப்பான் !
கணக்கில் கெட்டிக்காரன் !
ஆனால்
எனக்காக செலவு செய்த
கணக்கில் மட்டும்
வேண்டுமென்றே கோட்டை விடுபவன் !
என்னுடைய நண்பன்
அவனுக்கும் நண்பன் !
என்னுடைய எதிரி
அவனுக்கும் எதிரி !
இந்த விசயத்தில் மட்டும் அவன் ,
கடைசி வரை
கற்புக்கு அரசனாக இருந்தான் !
காதலிக்காக
வேறு வேலை தேடினான் !
அவனுடைய மனசுக்காக
நல்ல வேலை கிடைத்தது !
மகிழ்ச்சியாகத்தான் இருந்தது !
அவனுடனான கடைசி நாளை
கொண்டாடித் தீர்த்தோம் !
அவனது உடைமைகளோடு
அவனை வழியனுப்பிய போது
மனதுக்கு நிறைவாய் இருந்தது !
திரும்பி அறைக்கு வந்து ,
தனிமையை உணர்ந்த போது தான்
உண்மை உரைத்தது !
இனிமேல் அவன்
இங்கு இருக்கப்போவதில்லை !
குறுஞ்செய்திகள் ,
மின்னஞ்சல்கள் ,
அலை பேச்சுக்கள் ,
இவையாவும் அவனது
வெற்றிடத்தை முழுமையாக
நிரப்பப் போவதில்லை !
அவன் இருந்த அறை !
அவனோடு மல்யுத்தம்
நடத்திய தலையணை !
அவன் தூய்மை செய்த
எனது தட்டுக்கள் !
அவன் கடைசியாகப்
பரிசளித்த வாசனை திரவியம் !
எல்லாம் இருந்தன
அவனைத் தவிர !
முதன் முறையாக
சூனியத்தை உணர்ந்தேன் !
இரண்டு நாட்கள் கழித்து ,
அலைபேசியில்
" மச்சி " என்று
அவன் அழைத்த போது ,
என்னால் ,
கண்ணீர்த் துளிகளை
கட்டுப்படுத்த முடியவில்லை !
Comments
Post a Comment