சொல்லி விடு அன்பே
ஒரே ஒரு முறை
சொல்லி விடு !
என் மீதான
உனது காதலை
ஒரே ஒரு முறை
சொல்லிவிடு !
சொல்லி விடு !
என் மீதான
உனது காதலை
ஒரே ஒரு முறை
சொல்லிவிடு !
நானாக எனது காதலை
உன்னிடம் சொன்னபோது கூட - நீ
மௌனமாகத்தான் கேட்டுக்கொண்டாய்
அதை நான்
சம்மதமாக எடுத்துக்கொண்டேன் !
உனக்கான
காலை வணக்கத்தை
குறுஞ்செய்தியில் வருவிக்கிறேன் !
மதிய வணக்கத்தை
மின்னஞ்சலில் தெரிவிக்கிறேன் !
இரவு வணக்கத்தை
அலைபேசியில் அறிவிக்கிறேன் !
ஆனால் ,
சிலநேரங்களில் நீ
சிரிப்பதே இல்லை !
அலைபேசியில் கூட
அளந்துதான் பேசுகிறாய் !
பெரும்பாலும்
நானே பேசுகிறேன்
நீ கேட்டுக்கொண்டு இருக்கிறாய் !
எனது
பிறந்தநாளன்று தான்
உனது
புன்னகையே பார்க்கக் கிடைத்தது !
நாணம் மறந்திருப்பாயென
நானாகத் தொட்டாலும்
தீயாக சுட்டதென
நீயாக விலகிக் கொள்கிறாய் - காதல்
நோயாகக் கசக்கிறது !
கோவிலில் கூட
கடவுளோடுதான் பேசுகிறேன் !
கடற்கரைகளில்
காற்றுதான் வாங்க முடிகிறது !
திரையரங்குகளில்
திரையைத்தான் பார்க்கிறோம் !
வண்டியில் அமர்ந்தாலும்
விலகியே அமர்கிறாய் !
நாசுக்காய்ப் பழகுவதென்றால்
நண்பர்களாகவே இருந்து விடலாம் !
கனவில்தான் காதலென்றால்
கண்ணியமாகப் பிரிந்துவிடலாம் !
அம்மா
அதட்டுவாள் !
தந்தை
திட்டுவார் !
அண்ணன்
ஆவேசப்படுவான் !
என்றெல்லாம்
சாக்கு சொல்கிறாய் !
இங்கே உனக்கென்று
இன்னொரு இதயம் துடிப்பதை
உணர மறுக்கிறாய் !
வணக்கங்கள் இல்லையென்றால் - காதல்
வாழாது போலிருக்கிறது !
ஆகையால்
இனிமேலாவது அன்பே ,
காலை வணக்கத்தை
கனிவோடு அனுப்பு !
மதிய வணக்கத்தை
மகிழ்வாய்த் தெரிவி !
இரவு வணக்கத்தை
இனிமைகாகக் கூறு !
செல்ல சீண்டலை
சிறிதேனும் அனுமதி !
இன்பப் புன்னகையை
இயன்றவரை வீசிச்செல்
தொட்டுப்பேச
விட்டுக்கொடு !
கெஞ்சிய பிறகாவது
கொஞ்ச விடு !
பார்வையிலாவது
அணைக்க விடு !
அணைக்க விடு !
வெள்ளிக்கிழமைஎன்றால்
சேலையில் வா !
முத்தத்தை
காற்றிலாவது அனுப்பு !
கணநேரமாவது
காதலோடு பார் !
வேண்டாம் என்பதையும்
வெட்கத்தோடு சொல் !
நகர்ந்து சென்றாலும்
நாணத்தோடு செல் !
விலக்கி விட்டாலும்
விலகி விடாதே !
அலைபேசியில் நீயாக
அவ்வப்போது அழை !
கைகளைக் கோர்த்துக்கொண்டு
காலாற நடப்போமே !
இதெல்லாம் கூடத்
தேவை இல்லை !
என்மீதான உனது காதலை
நீ இதுவரை சொல்லவே இல்லை !
நானாக எனது காதலை
உன்னிடம் சொன்னபோது கூட - நீ
மௌனமாகத்தான் கேட்டுக்கொண்டாய்
அதை நான்
சம்மதமாக எடுத்துக்கொண்டேன் !
ஆகவே அன்பே ,
ஒரே ஒரு முறை
சொல்லி விடு !
என் மீதான
உனது காதலை
ஒரே ஒரு முறை
சொல்லிவிடு !
சொல்லி விடு !
என் மீதான
உனது காதலை
ஒரே ஒரு முறை
சொல்லிவிடு !
Comments
Post a Comment