குறிப்பு : இந்தக் கவிதை பிரம்மச்சாரி இளைஞர்களுக்கு மட்டும்

'குடி'யுரிமை

இளைஞனே ,

நேற்று மாலை

மதுவருந்தியதற்க்காக நீ

மனம்வருந்தாதே !

மது குடிப்பதற்கான

முழு உரிமையும் உள்ளவன் நீதான் !

பிறந்தவூர் என்பது உனக்கு

மறந்தவூர் ஆகிவிட்டது !

தொலைவில் உள்ளதாலேயே , அது

தொலைந்த ஊர் ஆகிவிட்டது !

சொந்த ஊர் விட்டு ,

பிழைப்புத் தேடி

வந்த ஊர் என்பது

வாழ்க்கையில் மிகவும்

நொந்த ஊர் ஆகிவிட்டது !

பேயைப் போல உழைத்தாலும்

நாயைப் போல நடத்தும்

பணியிடம் என்னும் பிணியிடம் !

காதலிக்க ஆளின்றி

பேதலிக்கும் மனது !

சுகமான

மதியத் தூக்கத்தின் பின்வரும்

சூனிய மாலைகள் !

கடைகளில்

கிடைத்ததைத் தின்று

பேதி வந்து

பாதி செத்தாலும்

நாதியில்லாத நிலை !

வாசலில் அமர்ந்து

வீதியைப் பார்த்து

விரக்தியை வளர்த்து

நீ கழித்த விடுமுறைகள்

எத்தனை எத்தனை ?

பெருங்கூட்டப் புகைவண்டியில்

ஒற்றைக் காலில் நின்றுகொண்டு

இரவெல்லாம் அயராத இமையோடு ,

தோளைவிட்டுப் பெயராத சுமையோடு ,

பயணம் முழுக்க சயனம் இன்றி ,

பாதிஇறந்து பிறந்தவூர் வந்து

பயணக்களைப்பில் பகலெல்லாம்

படுத்துறங்கி படுத்துறங்கி

நீ தொலைத்த பண்டிகை நாட்கள்

எத்தனை எத்தனை ?

வாலிபத்தின் பசிக்கு

காதல் கனி கிடைக்க

வசதியாய் இருக்க வேண்டும் , அல்லது

வனப்பாயிருக்க வேண்டும் !

அது ,

' இருப்பவர்களுக்கு ' மட்டுமேயான

இளமையின் இன்பவிளையாட்டு !

இதுபோன்ற விளையாட்டில்

ஈடுபடத் தகுதியற்ற

உன்னைப் போன்றவர்கள்தான்

உண்மையிலேயே ,

குடிப்பதற்கான

'குடி' யுரிமை பெற்றவர்கள் !

இரவுப்பணி முடித்து ,

பார் மறந்து பாயில் படுத்துறங்க

'பார் ' தேடி நீ போவதொன்றும்

போர் குற்றம் ஆகாதடா !

உனக்கு ,

நயந்து பேச நங்கை இல்லை !

மயங்கிப் பேச மங்கை இல்லை !

கொஞ்சிப் பேச வஞ்சி இல்லை !

சேவை செய்ய பாவை இல்லை !

மாதின் போதை மறுக்கப்பட்ட உனக்கு

மதுவின் போதை கொள்ள

மறுப்பேதும் மண்பதையில் இல்லை !

மனம் போல நீ மதுவருந்து !

இளமைக்கு அது , புதுவிருந்து !

இளைஞனே ,

உனக்கொரு

காதலி கிடைக்காததுதான்

உன் வாலிபத்திற்கு வந்த

உண்மையான இழுக்கு !

குடித்துப்பார் மறைந்துபோகும்

புறவுலகின் ,

தொன்மையான அழுக்கு !

இறுதியாக ஒன்று ,

மனதிற்கினிய மனைவியும் ,

பேர்சொல்லப் பிள்ளையும்

இவ்வாறாக ,

குதூகலித்துக் கொண்டாட

ஒரு குடும்பம்

உனக்கென்று வாய்த்துவிட்டால்

குடிப்பதற்கான முழு உரிமையும்

பகிங்கரமாக உன்னிடமிருந்து

பறிக்கப்படுகிறது என்பதைமட்டும்

புத்தியில் இருத்திக்கொள் !!!

பின்குறிப்பு : பார் , மண்பதை - உலகம் , தொன்மை - பழமை , சயனம் - உறக்கம் .