இப்படியும் இருங்களேன் ...........
அந்த காலை நேரத் தேநீர்
சுவையாக இருந்தால்
ரசித்துக் குடியுங்களேன் !
அதன் பிறகு அன்று
'தினசரி ' வரவில்லையென்ற எரிச்சலை
துணைவியிடம் காட்ட மாட்டீர்கள் !
விட்டுப் போன பேருந்தை
விரட்டாமல் விட்டுத்தான் பாருங்களேன் !
குறைந்தபட்சம் அன்றைய தினம்
உங்கள் பணப்பை பத்திரமாயிருக்கலாம் !
தேர்வில் தோற்ற உங்கள் மகனைத்
திட்டாமல் தேற்றுங்களேன் !
அடுத்த தேர்வில் அதிசயமாய் அவன்
அற்புத மதிப்பெண்கள் பெறலாம் !
கையேந்தி நிற்கும்
அந்தப் பிச்சைக்காரிக்கு
இருப்பதிலிருந்து
இயன்றதைக் கொடுங்களேன் !
நிகழவிருக்கும் நஷ்டமொன்று
அதனால் தடுக்கப்படலாம் !
உங்களை நோக்கி
துப்பாக்கியை நீட்டும்
உங்கள் எதிரியிடம்
ஒரு புன்னகை புரிந்துதான்
பாருங்களேன் !
அவனது கைகள் அடுத்தநொடியே
அன்பினால் செயலிழந்து போகலாம் !
பேருந்தில்
காலியான அந்த இருக்கையை
நின்றுகொண்டிருக்கும்
நரைக்கிழவிக்கு விட்டுத்தான்
கொடுங்களேன் !
அடுத்த நிறுத்தத்தில் உங்களுக்கு
ஜன்னலோர இருக்கையே
ஜம்மென்று கிடைக்கலாம் !
உங்கள் தலைமையின் தரம்
திருப்தியளிக்கிறதா என்று
உங்கள் ஊழியனிடம் ஒருநாளாவது
கேட்டுப் பாருங்களேன் !
அதன் பிறகு அவன் என்றுமே
உங்களுக்கு உண்மையாயிருக்கலாம் !
ஏதோ சண்டையால்
உங்களோடு பேசாமலிருக்கும்
உங்கள் அலுவலக நண்பனை
ஒரு காபி சாப்பிட
நீங்களாக அழையுங்களேன் !
அதன் பிறகு என்றென்றும்
நீங்கள் நண்பர்களாகவே இருக்கலாம் !
குடித்துக் கழிக்கும்
வாரயிறுதிக் கொண்டாட்டத்தில்
ஈடுபடாமல் தான் இருங்களேன் !
அதனாலேயே
அந்த மாதத்தின் மழை
பொய்க்காமல் பெய்யலாம் !
உலக நன்மையின் பொருட்டு
கணநேரமாவது உங்கள்
கடவுளின் முன்பு
கண்மூடி நில்லுங்களேன் !
அதனால் ,
சீறவிருக்கும் ஒரு சுனாமியும்
சும்மாயிருந்து விடலாம் !!!
Comments
Post a Comment