Monday, September 23, 2013

அறை





கற்றுக்கொள்ளாதபோது
சமைத்த
அந்த
முதல்சமையலின் ருசி,
கற்றுக் கொண்டபிறகு
சமைத்த உணவுகளில்
இதுவரை கிடைக்கவில்லை !

வெறும்
வெங்காயத்தை மட்டுமே
நறுக்கித்தரும்
சமைக்கத்தெரியாத ஒருவன்
எல்லா அறைகளிலும்
இருக்கிறான் !

அவன்
உண்பான் என
இவனும்
இவன்
உண்பான் என
அவனும்
இருந்ததில்
மீந்து போய்
வெளியில் கொட்டும்
கலாச்சாரம்
அறையினுடையது !

எப்போதெல்லாம்
அறையில் அசைவம்
சமைக்கப்படுகிறதோ
அப்போதெல்லாம்
அறையின்
அசைவம் சாப்பிடாதவன்
ஊருக்குப் போயிருப்பான் !

எல்லா
அறைகளிலும்
ஏதோ ஒருவன்
சதா காதலியிடம்
பேசிக் கொண்டேயிருக்கிறான் !

தொலைந்த
பொருளுக்கு
அறையில் இருப்பவர்களை
சந்தேகிப்பது கூடாது !

தண்ணீர்
வராதநாட்கள்
அறையின்
துக்கநாட்கள் !

அறையில்
மதுவருந்தும் போது
நண்பர்களின் சத்தம்
அக்கம் பக்கம்
கேட்டு விடக்கூடாதென்று
அவ்வப்போது அவர்களை
அமைதிப்படுத்திக்
கொண்டிருப்பவனின்
அவஸ்த்தை
அழகானது !

அறையில்
ஒருவன்
தொலைக்காட்சி
பார்க்கிறபோது
வருகின்றஉறக்கம்
யாருமில்லாத
'அறைத்தனிமையில்'
வருவதில்லை !

எப்போது
ஒரு அறையின்
வரவு செலவுக் கணக்கு
அதைப் போட்ட
நபர்
இல்லாத சமயத்தில்
சரிபார்க்கப்படுகின்றதோ
அப்போது
கெட ஆரம்பிக்கிறது
அந்த அறையின்
கற்பு !

மகிழ்ச்சியோ
துயரமோ
ஒருவன்
பகிர்ந்து கொள்வது
முதலில்
அறையில்
இருப்பவர்களோடுதான் !

வேலை தேடியோ
வேலை பெற்றோ
வருகின்ற
ஒருவனுக்கு
அடைக்கலம் தராத
ஒரு அறை
இந்த உலகத்தில்
இல்லவே இல்லை !

'சகோதரர்கள்
நான்கு பேர்
ஒரே வீட்டில்
வசிப்பதற்கும்
பணி நிமித்தம்
நான்கு பேர்
ஒரே அறையில்
வசிப்பதற்கும் .............
உண்மையைச் சொன்னால்
வித்தியாசம் இல்லை !


4 comments:

  1. அறையைப்பற்றி நன்கு அறிந்தும் அறைந்தும் சொல்லியுள்ளது அழகாக உள்ளது. பாராட்டுக்கள்.

    ReplyDelete
    Replies
    1. கருத்துக்கு நன்றி ஐயா

      Delete
  2. சூப்பரா இருந்தது கவிதை குறிப்பாக அறையின் கற்பு குறித்த பார்வை

    ReplyDelete
    Replies
    1. கவிதையின் குறிப்பிட்ட பகுதியை குறிப்பிட்டு சொன்னதற்கு நன்றி தோழி !

      Delete