பயணம்

குறிப்பு : இந்தக் கவிதை பேருந்தைப் பற்றியதல்ல

ஊருக்குப் போவதில்
உறுதியாக இருந்தால்
ஒரு பேருந்தை விட்டாலும்
இன்னொரு பேருந்தைப்
பிடித்தாவது
நாம்
ஊருக்குப் போய்விடுவோம் !

பேருந்து
உரிய நேரத்திற்கு
வரவில்லை !
நம்மைப் போலவே
இன்னும் சிலர் காத்திருக்கிறார்கள்
எனும் போது
தாமதித்தாலும்
வரவேண்டிய பேருந்து
வந்தே தீரும் !

பேருந்து
கல்லறை நோக்கிப்
போகிறது எனில்
பயணம் சுகமாயிருந்து
யாதொரு பயனும் இல்லை !
பேருந்து,
பூந்தோட்டத்தை நோக்கிப்
போகிறது எனில்
பயணம் கடினமாயிருப்பதில்
பிழையொன்றும் இல்லை !

ஐம்பது பேர்
உடன் பயணித்தும்
பக்கத்து இருக்கைக்காரனுடன்
பேசாதவன்
தனியாகத் தான்
பயணிக்கிறான் !

எங்கும் நிற்காத
பாயிண்ட் டு பாயிண்ட்
பேருந்தில் ஏறினாலும்
அதுவும் ஏதாவது
ஒரு இடத்தில்
நிற்கவே செய்யும்  !

ஒரே இடத்தில் ஏறி
ஒரே இடத்தில்
இறங்கினாலும்
பயண நோக்கம்
ஒருவருக்கொருவர்
வேறுபடத்தான் செய்கிறது !

தொலைவு
அதிகமாக இருந்தால்
பயணச்சீட்டின் விலையும்
அதிகமாகத் தான் இருக்கும் !

நிறுத்தம் வருவது
தெரியாமல்
தூங்கிக் கொண்டிருப்பவர்களை
விழித்துக் கொண்டிருப்பவர்கள்
சற்று
எழுப்பி விடலாமே !

நடக்கக்கூடிய அளவுதான்
கடக்கக்கூடிய தொலைவு
என்றால்
நடந்தே போய்விடலாமே !
பேருந்திற்காகக்
காத்திருபானேன் ?