ரயில் சினேகிதி
சட்டென்று
எனக்குள்
சகலமும்
வெளிச்சமாகி
விடுகின்றன,
எதற்கோ புன்னகைத்தபடி
எதிரே வந்தமர்ந்த
அவளைப் பார்த்ததும் !
கோழிக்குஞ்சை
உள்ளங்கையில்
பொத்திக் கொண்டால்
எப்படியிருக்குமோ
அப்படியிருக்கிறது
என் காதுகளுக்கு
யாருடனோ பேசியபடி
அவள் சிரிப்பது !
வேடிக்கை பார்த்தபடி
பூ விரல்களால்
அவள் கழுத்தை
அவளே
வருடிக் கொள்கிறாள் !
இங்கே எனக்கு
சொக்குகிறது !
எப்படியும்
நிமிர்ந்து என்னைப்
பார்த்து விடுவாள்
என்ற நம்பிக்கையில் தான்
எழுந்து போய்
காசு போடுகிறேன்
அந்த
குருட்டுப் பிச்சைக்காரனுக்கு !
இளஞ்சிவப்பு
நெயில் பாசிஷ்
தடவிய
அவள் பாதங்களைப்
பார்த்துக் கொண்டிருக்கறேன்,
சட்டென்று
கதை பேச
ஆரம்பிக்கின்றன
அந்தப் பாதங்கள்
என்னோடு !
நீர் குடிப்பதற்காக
அந்த வாட்டர் பாட்டிலின்
மூடியை
மென்மையாக
மிக மென்மையாக
அவள் திருகுகிறாள்,
தேவராகம்
கேட்டது போல
இன்பமாக அதிர்கிறது
என் பின்னங்கழுத்து !
பற்ற வைத்த
அணுகுண்டு
எப்போது வெடிக்குமென
பதைப்போடு
பார்ப்பது போலப்
பார்க்கிறேன்
உறக்கத்தில்
இமை மூடிய
அவள் விழிகளை !
அவளை விட
அழகான ஒருத்தி
அங்கே வந்து நின்றாலும்
அந்த அழகியைப்
பார்க்க விடாமல்
ஏதோ ஒரு கற்பு
உள்ளுக்குள்ளே தடுக்கிறது
என்றால்
அந்த கணத்தில்
எனக்கும் அவளுக்கும்
என்ன உறவு ???
ஒப்புமைகள் அனைத்தும் அருமை நண்பா எளிய காட்சிகளை உவமைகள் பிரமாண்டமாக்குகிறது ..............உள்ளுக்குள் காதல் துளிர்த்துவிட்டால் இப்படிதான் நிலைகொள்ளாமல் வெளியே சிதறும் வார்த்தைகள் ..............வாழ்த்துக்கள் நண்பா காதல் கைகூட
ReplyDeleteஹெலோ வெயிட் வெயிட் ...................இக்கவிதையின் ஓரிடத்தில் கூட " நாங்கள் " பார்த்துக் கொள்ளவில்லை ! ஒரு பெண்ணிடம் காதல் கைகூட வேண்டுமென்றால் அவளை ஒரு குறிப்பிட்ட இடத்தில் தொடர்ந்து பார்க்க வேண்டும் ! இப்போது இந்த இரயில் சினேகிதியை மீண்டும் எங்கேயாவது பார்ப்பதற்கான நிகழ்தகவு ஒரு லட்சம் கோடியில் ஒன்றாக இருக்கும் ! அப்படியிருக்கையில் " அது " எப்படி சாத்தியம் ?
Deleteஇதனைக் காதல் என்று சொல்லிவிட முடியாது . ஈர்ப்பு எனலாம். அந்த ஈர்ப்பு இரயில் பயணம் முடிந்து வேறு ஒரு பெண்ணை சந்தித்து இது போன்றதொரு எண்ணம் ஏற்படவில்லையெனில் .... அப்போதும் அதே பெண்ணின் நினைவென்றால் அது காதல் .காதல் கோட்டையை தகர்த்து விட்டேனா..
ReplyDeleteஆனால்
கவிதை அழகு.
தோழி ! நீங்கள் சொல்வது சாட்சாத் உண்மை ! ஒரு ஈர்ப்பு ! அம்புட்டுத்தேன் ! மற்றபடி கோட்டையுமில்லை ! சாட்டையுமில்லை ! நன்றி !
Deleteஅழகான வரிகள்... ரசித்தேன்...
ReplyDeleteஎனது dashboard-ல் இன்னொரு பதிவும் வந்துள்ளது... (தலைப்பு மட்டும் உள்ளது) கவனிக்கவும்...
நீங்கள் ரசித்ததால் அந்த வரிகள் இன்னும் அழகாகி விடுகின்றன நண்பரே ! நன்றி !
Delete