Monday, April 25, 2011

கவிதை செய்தல்




உயிரை உருக்கித்


தயாரிக்கும்


உணர்வின் இரசம் !




மூளையைப் பிழிதெடுக்கும்


மொழிச்சாறு !




உணவுண்ணும் போதும்


கனவுண்ணும் கைங்கர்யம் !




கற்பனையின் ,


கையில் அகப்பட்டது


கைவிட்டுப் போகாதிருக்க


கையோடு இருக்கும்


கைக்குறிப்பு !




குளியலறையிலும்


குதித்தாடும் சிந்தனைகள் !




பணிநடுவிலும்


அணிவகுக்கும் அழகுணர்ச்சி !




சக மனிதனின்


சூழல் திருடும் சாமார்த்தியம் !




உலகப் படைப்புகளில்


ஊழல் செய்யும் சாணக்கியம் !




ரகசியங்களை


ரசனைப் படுத்தும் ரசாயனம் !




பழமையைப் புறந்தள்ளும்


பௌதிகம் !




பிறப்பெடுத்த மலர்ச்சியிலும்


பிரசவித்த அயர்ச்சி !




புத்தி சொல்லும் கேனத்தனம்


புத்தி இழக்கும் ஞானத்தனம் !




உணர்ச்சிக்கு


வடிவம் கொடுக்கும் வித்தை ! - மொழியுடனான


புணர்ச்சிக்கு


படுக்கை விரிக்கும் மெத்தை !




எண்ணங்களின் வானவில்லுக்குப்


பேனாவால் மழை பொழிதல் !




உண்மையின் அந்தரங்கம் மறைக்க


பொய்யால் ஆடை நெய்தல் !




ஒரே ஒரு வார்த்தைக்கும்


வாரக்கணக்கில் மெனக்கெடுதல் !




பாலையில் சோலை தேடுதல்


சோலையில் பாலை தேடுதல் !




எண்ணங்களின் கோலத்திற்கு


வார்த்தைகளால் வண்ணமிடுதல் !




அறிவு என்னும் தறி கொண்டு


வரி எனும் நூல் கொண்டு


மொழிப்பெண்ணின் மானம் காக்க


சேலை நெய்யும் கலை !




கவியில் வாழாத நாட்கள் ,


புவியில் வாழாத நாட்கள் !




யாசித்ததை வாசித்து


வாசித்ததை நேசித்து ,


நேசித்ததை யோசித்து ,


யோசித்ததை வேசித்து


வேசித்ததை .....................


ச்சே ! இதற்கு மேல்


எதுகை எட்டவில்லை


விட்டு விடுங்கள் !




இதைப் பற்றி


சொல்லிக்கொண்டே போனால் ,


இது ஒரு


முடியாத முடிவிலி !




இதை ,


இப்போதைக்கு


நிறுத்தி வைக்கும் நான் ஒரு


" முடியாத " அறிவிலி !!!




No comments:

Post a Comment