Saturday, April 9, 2011

பிழைப்பு


மூன்று மணிக்கு

முந்தி எழுந்து ,


காபி குடித்து

கண்ணுறக்கம் தொலைத்து ,


காலைக் கடன்களைக்

கடிதே முடித்து ,


வெள்ளாவி வெந்நீரை

விரலிடுக்கில்

விளாவிக் குளித்து ,


அழுக்கு சீருடையை

அலுக்காமல் அணிந்து கொண்டு ,


தூக்கத்தில் திளைக்கும்

அறை நண்பனை

ஏக்கமாய்ப் பார்த்துவிட்டு ,


கலைத்து விடாமல்

கதவைச் சாத்தி ,


வெளியே வந்து

விதியை நொந்து ,


நிறுத்தத்தில்

நின்றபடியே

நேரம்போகக் காத்திருந்து ,


தொழிற்ச்சாலை ஊர்தியில்

சிறைச்சாலைக் கைதி போல ,


விடுபட்ட உறக்கத்தை

வழிநெடுக விரட்டிப் பிடித்து ,


வளாகம் வந்ததும்

விரைந்து இறங்கி ,


வரிசையில் நின்று

வருகையைப் பதிந்து ,


அதிகாலை இட்டிலியை

அரைவயிற்றில் அடைத்து விட்டு ,


இரவுப் பணியாளனிடம்

இறுதி நிலவரம் இயம்பக் கேட்டு ,


விட்டுப் போன பணிகளைத்

தொட்டுத் துலக்கி தூசி தட்டி


சமயம் வாய்த்தபோது

சாயவிருக்கையில் சாய்ந்துறங்கி ,


போன பொழுதுணர்ந்து

பதறி எழுந்து ,


பாதிப் பணியின்

மீதி முடித்து ,


மேலதிகாரியின்

முறைப்பை

முகத்தில் வாங்கி ,


ஓய்வு இன்றி

ஆய்வு செய்து ,


உடல் நோக

உள்ளம் சாக ,


இட்ட வேலையை

ஓட்ட முடித்து ,


வசதி வாய்த்தால்

வம்பு பேசி வம்பு வளர்த்து ,


அந்தி சாய்வில்

அலுவல் முடித்து ,


அயர்ந்து போய்

அறைக்குத் திரும்பி ,


தானே சமைத்து

தானே உண்டு ,


திரும்பவும் படுத்து

திரும்பவும் எழுந்து ,


மற்றுமொரு நாளை

மறுபடியும் தொடங்கி ,


...............................................

...............................................

...............................................


இப்போதெல்லாம்

தெரு நாயைப் பார்த்தால் கூட

சற்று பொறாமையாய் இருக்கிறது !!!

















No comments:

Post a Comment