காதலியே கேள் .....

காதலியே கேள் !

இனிமேல் நாம்

மழையில் நனைய வேண்டாம் !

அமுத மழை இப்போதெல்லாம் ,

அமிலத்தை அணிந்துதான்

தரையையே தொடுகிறது !

வடுகப்பட்டிக் கவிஞன் சொன்னானென்று ,

வானின் நிறத்தை மையாக்கி ,

காதல் கடிதம் தீட்டச் சொன்னாய் !

நானிலத்தின் கழிவுகளால் ,

நீலம் எல்லாம் நீர்த்துப்போக ,

வார்த்தையை வடிக்க

வழியின்றி விழிக்கிறேன் !

தண்ணீரை உன்னுடன்

ஒப்பிடச் சொல்கிறாய் !

குளோரின் குரூரமாகச் சிரிப்பது

கேட்கவில்லையா உனக்கு ?

மொட்டை மாடியில் ,

காற்று வாங்குவதைக் குறைத்துக்கொள்வோம் !

ஏனென்று கேட்கிறாயா?

ஹைக்கூத் தென்றலை ,

ஹைட்ரோ கார்பன் கவர்ந்து விட்டதாம் !

செய்தியை , செவிமடுக்க வில்லையா நீ ?

கணநேரமாவது ,

குளிர்ச்சியைக் குறைத்துக்கொள்வோம் !

ஓசோன் ஒருநாளாவது

ஓய்வெடுக்கட்டும் !

உந்தன் ,

பார்வையின் மின்சாரமே போதுமே !

புறவுலக மின்சாரத்தை

பத்திரப்படுத்துவோம் !

பூச்சிக்கொல்லிகள்

ஆட்சி செய்வதால் ,

பருக்கைச்சோற்றைப் பகிர்ந்து கொள்வதை

பெருமளவில் குறைத்துக்கொள்வோம் !

புகையின் பகையை ,

பூமி இனிமேலும் பொறுக்காது !

ஆகையால் ,

காலாற நடந்தே ,

காதலை அனுபவிப்போம் !

இனிமேலான இரவுகளில் ,

காற்றைத் தூது விட்டே பேசிக்கொள்ளலாம் !

கதிர்வீச்சுக்களின் கோபமூச்சு ,

கடுகளவேனும் குறையட்டுமே !!!