மன்னிக்காதே தாயே
இந்த நூற்றாண்டின்
இறுதி விவசாயி நான் !
மகன் மென்பொருள் மேதை !
மகள் அமெரிக்கப் பேதை !
அடுத்த தை வந்தால் ,
அகவை அறுபது !
பத்தினி போய்ச்சேர்ந்து
ஆகிவிட்டன ஆண்டுகள் இருபது !
இப்போதெல்லாம் நான் ,
பேச முடிந்த ஊமை !
கேட்க முடிந்த செவிடன் !
பார்வையைப்பற்றிக் கேட்கிறீர்களா ?
கண்களைத் தான்
தொலைக்காட்சிப்பெட்டிக்குத்
தாரை வார்த்துத் தந்துவிட்டேனே !
"ஒரு காலத்தில் ,
யானை கட்டிப் போரடித்தோம் !
கழனி கழனியாய்
உழவு செய்தோம் !
களம் களமாய்
நெல் குவித்தோம் !
இப்போதைய சாகுபடி என்ன ? "
முந்தாநாள் கனவில்
முப்பாட்டன் வந்து கேட்டான் !
விதை விதைத்தவன்
வீழ்ந்து விட்ட ,
நாற்று நட்டவன்
நாணிச் செத்த ,
நேற்றைய நிலவரத்தை
கடைசி வரை மறைத்துவிட்டேன் !
இப்போதெல்லாம்
அரிசிக்கு பதில் அசைவம் !
அதிகாலையில் ஆட்டிறைச்சி !
மதியத்தில் மாட்டிறைச்சி !
இராப்பொழுதில் இறால் , மீன் , நண்டு இத்யாதிகள் .....
மாட்டிறைச்சிக்கு மாற்றாய் ,
மனித இறைச்சி வருவதற்குள் ,
மாண்டு விட வேண்டும் !
வெளியே என் அன்னை
குற்றுயிரும் குலையுயிருமாய்க் கிடக்கிறாள் !
அவளைக்கூறு போட்டுக் கூவி ,
விற்கின்றன வியாபார நாய்கள் !
ஒரு காலத்தில் ,
பச்சை பச்சையாய்ப் பூத்தவள் !
வண்ண வண்ணமாய் விளைந்தவள் !
கார்மேகப் போர்வைக்குள்
மழைத்தந்தையுடன்
உறவாடிக்களித்தவள் !
தன் உதிரத்தை உணவாக்கி
உலகுக்கெல்லாம் ஊட்டி விட்டவள் !
தென்றலாய்த் தாலாட்டி
தரணியையே தூங்கச் செய்தவள் !
தங்கம் தங்கமாய்த் தந்தவள் - இப்போது
அங்கம் அங்கமாய் அறுபட்டுக்கிடகிறாள் !
அவள் பாகங்களைப்
பங்கு போட்டு பணம் பண்ணும்
பிசினஸ் புண்ணியவான்கள்
பயங்கரமாய்ச் சிரிக்கிறார்கள் !
என் அன்னை என்ன செய்வாளோ ?
பாவம் ! புழம்பித் தள்ள அவளிடம்
புழுதியும் மீதி இல்லை !
கதறியழ கண்ணீரில் ஈரம் இல்லை !
வெளியே சென்றால் ,
காப்பாற்றச் சொல்லி
கதறுவாளே என நான்
வீட்டுக்குள்ளேயே சிறை இருக்கிறேன் !
அன்னையே ,
தாயே ,
அம்மா ,
என்போன்ற
மானங்கெட்ட மகன்களை
முடிந்தவரை மன்னிக்காதே !!!
Ji... wonderfull...
ReplyDeletevegetation of Green soon will perish...
Something has to be done