செத்துப பெய்த மழை

என்ன சொல்லிப் பாடுவது ?

உன்னை என்ன

சொல்லிப்பாடுவது அன்பே ?

வார்த்தைக்கு

வலைவிரித்தாலும் ,

வரிகளை

வளைத்துப்பிடித்தாலும் ,

கவிதையைக் கைதுசெய்ய

என்னால் முடியவில்லை !

எதுகைகள்

எட்டாக்கனி என்றால்

மோனைகள்

முயற்கொம்புகள் !

உனக்காக

மொழியோடு மோதியதில்

மூளை மட்டும் மழுங்கிவிட்டது !

காவியங்களிடம்

கடன் வாங்கினாலும் ,

இதிகாசத்திடம்

இரவல் கேட்டாலும் ,

கற்பனை என்னவோ

கானல் நீர் தான் !

நிலா ,

வானம் ,

வானவில் ,

மேகம் ,

மழை ,

மின்னல் ,

தூறல் ,

தென்றல் ,

ஓடை ,

அருவி,

நதி ,

கடல் ,

மலர்,

தேன்

அன்னம்,

மயில்,

குயில்,

வண்ணத்துப்பூச்சி,

தங்கம்,

முத்து,

பவளம்,

வைரம்,

வைடூரியம் ,

இதயம் ,

சுவாசம்,

உயிர்,

இறைவன் ,

சொர்க்கம் ,

பேரின்பம் ,

- என யாவற்றையும்

வம்புக்கிழுத்து

உன்னோடு உவமைப்படுத்தினாலும்

உவப்புக்கொள்ள ஏனோ மறுக்கிறாய் !

நீயே சொல்லேன் ,

உன்னை என்ன சொல்லிப்பாடுவது ?